honneur

1re édition

HONNEUR.

■  Marque exterieure par laquelle on fait connoistre la veneration, le respect, l’estime qu’on a pour la dignité, ou le merite de quelqu’un. Rendre honneur à Dieu. il faut rendre honneur à qui il appartient, à qui il est deu. on luy a fait des honneurs extraordinaires. de grands honneurs. accompagner quelqu’un par honneur. porter honneur & respect. il luy a fait tout l’honneur, tous les honneurs imaginables. il ne faut pas rendre aux hommes des honneurs qui ne sont deus qu’à Dieu. Auguste se fit rendre des honneurs divins. faire quelque chose en l’honneur de quelqu’un, en l’honneur de Dieu. pour l’honneur de Dieu.
On appelle, Honneurs funebres, Les honneurs qu’on rend aux morts, les ceremonies des funerailles.
On appelle, Les honneurs de l’Eglise, Les préeminences & les droits honorifiques de l’Eglise.
En certaines grandes ceremonies, comme le Sacre des Rois, Baptesme, &c. on appelle, Les honneurs, Les pieces principales qui servent à la ceremonie. Les honneurs estoient portez par, &c.
On dit, Faire les honneurs de la maison, pour dire, En faire les ceremonies.
On dit, Faire honneur à un repas, pour dire, Y bien manger, & tesmoigner par là qu’on estime le repas.
On se sert aussi tres-souvent du mot d’Honneur par civilité & par compliment. Lors que j’auray l’honneur de vous vous. la lettre que vous m’avez fait l’honneur de m’escrire. faites-moy l’honneur de me dire.
On dit prov. A tous Seigneurs tous honneurs, pour dire, qu’Il faut rendre honneur à chacun selon son rang & sa qualité.
On dit par civilité, Sauf vostre honneur, pour dire, Sauf le respect que je vous dois. Il est vieux. L’honneur sauf je consens à cela, pourveu que cela ne prejudicie pas à l’honneur, l’honneur sauf.
Honneur, signifie encore, Vertu, probité. C’est un homme d’honneur, un vray homme d’honneur. c’est un homme plein d’honneur. il aime l’honneur, il aimeroit mieux mourir que de faire une mauvaise action. il y a de l’honneur en son fait. ce sont des gens d’honneur. il n’a ni cœur ni honneur. il est sans honneur. faire reparation d’honneur à une personne qu’on a offensée en son honneur.
On dit par maniere de serment, Sur mon honneur. je vous en respons sur mon honneur.
En parlant des femmes, Honneur, signifie Pudicité, chasteté. C’est une femme d’honneur, sans honneur. elle a fait faux bond à son honneur. elle a forfait à son honneur.
Honneur, se prend aussi, Pour la gloire qui suit la vertu, & pour la reputation & l’estime du monde. Acquerir de l’honneur. ambitieux d’honneur. avide d’honneur. il est dans un haut degré d’honneur. vous y aurez de l’honneur. il en est sorti à son honneur, avec honneur. il s’en est tiré avec honneur. l’estime & l’honneur du monde. Attaquer, blesser, fletrir, deschirer l’honneur de quelqu’un. taxer quelqu’un en son honneur. mesnager l’honneur, sauver l’honneur de quelqu’un. donner atteinte à l’honneur de quelqu’un. engager, hazarder son honneur, son honneur y est interessé, y est engagé. mettre son honneur en compromis. estre p. 569jaloux de son honneur. c’est un homme perdu d’honneur. faire reparation d’honneur. je vous engage ma foy & mon honneur. c’est le toucher en son honneur. il est delicat sur ce qui regarde l’honneur. il ne faut mettre son honneur que dans des choses loüables. le point d’honneur. il prit cela au point d’honneur. ils se sont battus pour un point d’honneur. c’est une tache à son honneur. ne souffrir point de tache à son honneur.
Mourir au lit d’honneur, se dit d’Un homme qui meurt à la guerre pour le service de l’Estat.
On dit, Faire honneur à son siecle, à son pays, à sa famille, pour dire, Luy acquerir de la gloire, de la reputation, de l’estime par son merite & par ses actions.
Honneur, se prend aussi pour Dignité, Charge ; mais en ce sens il n’a d’usage qu’au pluriel. Aspirer aux honneurs. estre élevé aux honneurs. les honneurs de la Republique. briguer les honneurs. il est parvenu aux plus grands honneurs par tous les degrez.
On dit, Chevalier d’honneur. Dame d’honneur. fille d’honneur de la Reine. enfant d’honneur. Conseiller d’honneur. Marguillier d’honneur.
On dit, Des personnes qui n’ont qu’un simple titre, qu’Ils sont Conseillers, Aumosniers, &c. ad honores.
On dit prov. Les honneurs changent les mœurs.

honorer

■ Honorer. v. act. Rendre honneur & respect. Honorer Dieu. honorer les Saints. honorer les Reliques. honorer Dieu dans ses Saints. honorer son pere & sa mere. honorer ses superieurs. honorer la memoire de quelqu’un.
Il signifie aussi simplement, Estimer, faire cas. C’est un homme que j’honore extremement. croyez que personne ne vous honore plus que moy. j’honore son merite & sa vertu.
Il signifie aussi, Faire honneur. Il honore son pays, son siecle. il honore sa charge, pour dire, Faire honneur à son pays, à son siecle, à sa charge. Il honore plus sa charge que sa charge ne l’honore.
Il signifie encore, Favoriser, gratifier en faisant honneur. Le Prince l’honore de ses bonnes graces. si vous voulez m’honorer de vostre protection. il m’honore de son amitié.
■ Honoré, ée. part.

honorable

■ Honorable. adj. v. de tout genre. Qui est digne d’estre honoré. La vertu est honorable mesme dans les ennemis. le merite est honorable par tout où il se trouve. En ce sens il n’a guere d’usage que dans ces phrases.
Il signifie aussi, Qui honore, qui attire de l’honneur, de la gloire, du respect. Il est dans un poste honorable. recevoir des blessures honorables. il a fait une fin honorable & glorieuse. mort, trépas honorable. action honorable. parvenir à une vieillesse honorable. il luy est honorable d’avoir deffendu si long-temps une mauvaise place contre une si grande armée. faire une retraite honorable. profession, condition honorable. employ, rang, caractere honorable. faire une mention honorable de quelqu’un.
Il signifie aussi, Splendide, magnifique dans la despense. Il est honorable, fort honorable. il fait une despense honorable. il fait les choses d’une maniere honorable. il nous a fait un accueïl, une reception tres-honorable.
Quelquefois, Faire une reception, un accueil honorable, ne sign. que Faire une reception honneste, & convenable à la qualité de celuy qui la fait, & de celuy à qui on la fait.
Honorable homme, Est une qualité que prennent dans les actes publics, ceux qui ne sont pas nobles, & qui sont pourtant d’une condition honneste.
Amende honorable, se dit d’Une espece de peine ordonnée par la Justice en satisfaction de quelque crime. Il a fait amende honorable, nud en chemise, la torche au poing.
On dit fig. & en raillerie, Faire amende honorable à quelqu’un, pour dire, Luy faire reparation d’honneur sur quelque chose de peu de consequence.

honorablement

■ Honorablement. adv. D’une maniere honorable. Il a esté receu honorablement, enterré honorablement. faire les choses honorablement. c’est un homme qui a tousjours vescu honorablement, tres-honorablement.

honoraire

■ Honoraire. adj. de tout genre. Il se dit des personnes qui n’ont que les honneurs de certains Emplois, de certaines Charges. Conseiller honoraire. Maistre des Requestes honoraire. tuteur honoraire.
On dit aussi, Titre honoraire, pour dire, Un titre qui n’apporte que de l’honneur.
■ Honoraire, est aussi substantif, & signifie, Ce que l’on donne à un Advocat au Conseil du Roy pour son playdoier, pour ses écritures.

honorifique

■ Honorifique. adj. de tout genre. Ce mot n’est en usage que pour les droits & prééminences d’honneur des Patrons, ou Seigneurs dans l’Eglise. Droits honorifiques.

deshonneur

■ Deshonneur. s. m. Honte. Il ne luy a point fait de deshonneur. c’est un grand deshonneur. tenir à deshonneur. causer du deshonneur à quelqu’un. faire deshonneur à ses parents.
On dit, Prier une femme de son deshonneur, pour dire, La solliciter contre son devoir.
Il se dit aussi fig. De toutes sortes de personnes de qui l’on veut exiger quelque chose contre leur devoir. Il me prioit de mon deshonneur. Mais en ce sens il se dit plustost par galanterie que serieusement.

deshonorer

■ Deshonorer. v. act. Oster l’honneur, perdre d’honneur. Deshonorer quelqu’un. vous vous deshonorez. vous le deshonorez. deshonorer toute une famille. deshonorer la memoire de ses ancestres. deshonorer sa profession. s’il fait telle chose, je le deshonoreray. deshonorer une fille, ce qui regarde particulierement sa pudicité.
■ Deshonoré, ée. part.

honneste

■ Honneste. adj. de tout genre. Vertueux, conforme à l’honneur & à la vertu. Amour honneste. honneste amitié. desir honneste. honneste ambition. moyen honneste. un honneste plaisir. un honneste divertissement. un honneste exercice. une honneste occupation. une honneste emulation. un procedé honneste. cela est indigne d’un honneste homme. cela n’est pas d’un honneste homme. ce n’est pas là une action d’un honneste homme. il ne hante que d’honnestes gens.
En ce sens on s’en sert quelquefois substantivement. L’Honneste, l’utile, le delectable. preferer l’honneste à l’utile.

honneste

■ Honneste. adj. signifie aussi, Convenable à la raison, bienseant à la condition, à la profession, & à l’âge des personnes. Il n’est pas honneste de se loüer soy-mesme. croyez-vous qu’il soit honneste d’en user de la sorte ? cela n’est pas honneste à une personne de vostre caractere, de vostre profession, de vostre âge. ces paroles-là ne sont pas honnestes dans la bouche d’un Religieux. il a fait une honneste retraite.
On dit, Une excuse honneste, un pretexte, un refus honneste, pour dire, Une excuse, un pretexte, un refus plausible, specieux, fondé sur quelque apparence de raison, de bienseance.
On dit, Present honneste, pour dire, Qui convient à celuy qui le fait, & à celuy qui le reçoit. On dit aussi dans le mesme sens, Recompense honneste.
On dit, Un prix honneste, pour dire, Un prix moderé, mediocre.
p. 570On dit, qu’Un habit est honneste, pour dire, qu’Il est convenable & bienseant à la condition, & à l’âge de celuy qui le porte. On dit dans le mesme sens, Meuble honneste. équipage honneste. depense honneste, bien honneste. ce meuble n’est pas magnifique, mais il est honneste. il fait une despense honneste.
On dit aussi, qu’Un habit est honneste, encore honneste, pour dire, qu’Il est encore bon pour estre porté.
On dit, Une naissance honneste. une condition honneste, pour dire, Une naissance, une condition qui n’a rien ny de bas, ny de qualifié. Il est d’une naissance, d’une condition honneste.
On dit, Une famille honneste, pour dire, Une famille à laquelle il n’y a rien à reprocher. C’est une famille honneste. il est né d’une famille honneste.
Honneste, signifie aussi, Civil, courtois, poly. C’est l’homme du monde le plus honneste. il n’y a rien de si honneste que luy. il a l’air honneste, les manieres honnestes. il luy a fait la reception du monde la plus honneste. accueil honneste. il luy a parlé d’une maniere tres-honneste. il a le procedé assez honneste, mais cependant il ne faut pas trop s’y fier.
Honneste homme. Outre la signification qui a esté touchée au premier article, & qui veut dire, Homme d’honneur, homme de probité, comprend encore toutes les qualitez agreables qu’un homme peut avoir dans la vie civile. C’est un parfaitement honneste homme. il faut bien des qualitez pour faire un honneste homme.
Quelquefois on appelle aussi, Honneste homme, Un homme en qui on ne considere alors que les qualitez agreables, & les manieres du monde : Et en ce sens, Honneste homme, ne veut dire autre chose que galant homme, homme de bonne conversation, de bonne compagnie.
Honneste homme, se dit aussi quelquefois par civilité d’Un homme qu’on ne connoist pas, ou dont on ne veut pas dire le nom, & qui paroist d’une condition honneste. Je rencontray un honneste homme. c’estoit un honneste homme qui me demandoit. il y a là bas un honneste homme qui veut vous parler.
■ Honnestes gens. plur. Se dit dans tous les sens d’honneste homme.
Honneste garçon, Se dit proprement d’un garçon bien né, bien élevé, & dont les mœurs & les inclinations sont douces & honnestes.
On appelle, Honneste debauché, Un homme qui ne s’emporte point excessivement dans la débauche, & qui y conserve tousjours l’air & le caractere d’un honneste homme du monde.
Honneste femme, honneste fille, Se dit proprement d’une femme & d’une fille qui sont chastes & vertueuses.

honnesteté

■ Honnesteté. sub. f. Bienseance. Il n’est pas de l’honnesteté de faire des choses trop familieres devant des gens à qui on doit du respect. cela est contre les regles de l’honnesteté.
Il signifie aussi, Civilité. Il n’a pas eu l’honnesteté de l’aller voir. il ne luy a pas fait la moindre honnesteté du monde. il le receut, il le traita avec toute sorte d’honnesteté. il luy a fait toutes les honnestetez imaginables.
Il signifie encore, Maniere d’agir obligeante & officieuse. L’honnesteté de son procedé. il en a usé avec la plus grande honnesteté du monde.
On dit, Faire une honnesteté, pour dire, Faire un present par reconnoissance, & par recompense. Il m’avoit rendu un service, &c. je luy ay fait une honnesteté.
Honnesteté, signifie encore, Chasteté, pudeur, modestie. Des paroles contre l’honnesteté. cela repugne à l’honnesteté. cela blesse, cela choque l’honnesteté. l’honnesteté des mœurs.

honnestement

■ Honnestement. adv. D’une maniere honneste. Il l’a tousjours aimée honnestement. c’est un homme qui en use fort honnestement. il s’en est deffait, il s’en est tiré honnestement. il est honnestement meublé. honnestement vestu. il l’a receu fort honnestement. il luy a parlé le plus honnestement du monde. c’est un homme qui a tousjours vescu fort honnestement.
Il signifie quelquefois, Suffisamment, passablement & par ironie, extremement. C’est honnestement vendu. il en a honnestement mangé. il est honnestement crotté. cela est honnestement chaud. elle est honnestement laide.

deshonneste

■ Deshonneste. adj. de tout genre. Ce qui est contre la bienseance, la pureté, ou la chasteté. Personnes deshonnestes. pensées deshonnestes. paroles deshonnestes. actions deshonnestes. gestes deshonnestes. livres deshonnestes. hanter des compagnies deshonnestes, les lieux deshonnestes.

deshonnestement

■ Deshonnestement. adv. Contre la pureté & pudicité. Vous parlez fort deshonnestement. vous vous comportez deshonnestement.

deshonnesteté

■ Deshonnesteté. s. f. Impureté, impudicité. Et ne se dit que dans ce sens là.

malhonneste

■ Malhonneste. adj. de tout genre. Ce qui est simplement contre la bienseance, & non pas contre la pureté. Cette action est malhonneste. cet habit est malhonneste.
Il sig. aussi, Ce qui est contre la civilité. Cet homme est mal-honneste, c’est à dire, Incivil, peu officieux.
Malhonneste homme, C’est l’opposé d’honneste homme.

malhonnesteté

■ Malhonnesteté. sub. f. Incivilité, manque de bien-seance. Il y a de la malhonnesteté en son procedé.

malhonnestement

■ Malhonnestement. adv. D’une maniere malhonneste.
Vous pouvez cliquer sur n’importe quel mot pour naviguer dans le dictionnaire.