reconnoissance

2e édition

RECONNOISSANCE.

sub. fem. v.
■  Action par laquelle en se remettant l’idée de quelque personne ou de quelque chose, on la reconnoist pour ce qu’elle est. Il y avoit long-temps qu’il n’avoit veu son fils, il le reconnut d’abord, & on s’estonna d’une si prompte reconnoissance. Oreste & Iphigenie se reconnurent & une lettre fut cause de leur mutuelle reconnoissance. dans les pieces de theatre le denouement se fait souvent par une reconnoissance. il reconnut les meubles qu’on luy avoit volez, & aprés que la reconnoissance qu’il en fit, eut esté verifiée devant le Juge, ils luy furent delivrez.
Il signifie aussi, Gratitude, ressentiment des bienfaits receus. Grande reconnoissance. eternelle reconnoissance. avoir de la reconnoissance. tesmoigner sa reconnoissance.
Il signifie aussi, Recompense qu’on donne pour reconnoistre un bon office, un service. Il vous a bien servi dans cette affaire, cela merite quelque reconnoissance. vous devez attendre de luy une honneste reconnoissance. vous en recevrez une honneste reconnoissance.
■ Reconnoissance. Acte par escrit pour reconnoistre qu’on a receu quelque chose, soit par emprunt, soit en depost ; ou pour reconnoistre qu’on est obligé à quelque devoir. Il me donna ses pierreries en garde, je luy en donnay ma reconnoissance. si vous me donnez ces papiers en main, je vous en ferai ma reconnoissance. il a passé une reconnoissance à son Seigneur, du cens qu’il luy doit. il a esté condamné à me passer titre nouvel & reconnoissance.
On appelle aussi, Reconnoissance de promesse, ou d’escriture, Un acte par lequel un homme reconnoist qu’une promesse est de luy, que l’escriture qu’on luy represente est de sa main. Il avoit fait une promesse sous seing privé, & il en a passé sa reconnoissance par devant Notaire. quand un homme nie un billet qu’on pretend estre de luy, il faut en venir à la reconnoissance par comparaison d’escriture ; mais quand il le reconnoist luy-mesme, il n’est plus besoin d’autre reconnoissance.
Vous pouvez cliquer sur n’importe quel mot pour naviguer dans le dictionnaire.