çà

1re édition

ÇÀ.

adv.
■  Icy. Venez çà. Il y a cette difference entre çà & icy, que çà marque tousjours un mouvement quand il est seul avec le verbe, Et icy, est adverbe de repos & de mouvement tout ensemble ; car on dit, Il est icy, & Dites-luy qu’il vienne icy.

çà et là

■ Çà et là. De costé & d’autre. Cà estant joint avec là se met avec tous les verbes de mouvement & de repos. Il va çà & là. il s’arreste çà & là.
On dit, Depuis deux mois, depuis deux ans en çà, pour dire, Depuis deux mois, depuis deux ans jusqu’à present.
On dit, Qui çà qui là, pour dire, Les uns d’un costé, les autres de l’autre. Ils courent tous qui çà qui là. ils dorment tous qui çà qui là.

deçà

■ Deçà et delà signifie la mesme chose que çà & là, & a le mesme usage, c’est à dire, quand il est adverbe ; comme, Qui deçà qui delà. il va deçà & delà ; Et, Il va çà & là. Mais Deçà & delà est aussi preposition, & Cà & là ne l’est jamais ; car on ne dit point, Çà & là la riviere ; mais Deçà & delà la riviere, & alors Deçà marque le costé de la riviere le plus proche de celuy qui parle ; & delà le plus esloigné.
On dit aussi dans le mesme sens, Au deçà & en deçà de la riviere ; & mesme absolument, Venez en deçà, venez au deçà ; mais quand il n’y a ny riviere, ny fossé &c. entre celuy qui appelle & celuy qui est appellé, on dit seulement, Venez en deçà ; & jamais, Venez au deçà.
On dit encore en ce mesme sens, Par deçà la riviere ; & absolument, Par deçà. venez par deçà.
On dit aussi, De deçà la riviere. les provinces de deçà la Loire.
■ Par deçà est preposition & adverbe tout ensemble ; Preposition ; comme, C’est bien par deçà la riviere ; Adverbe, comme, C’est bien encore par deçà.
Il signifie encore estant adverbe, En ces quartiers ; comme, Quand vous viendrez pardeça, venez me voir. Il sert aux verbes de repos, aussi-bien qu’à ceux de mouvement ; comme, Pardeçà on vit tout autrement.
■ De deçà Est encore un adverbe qui signifie la mesme chose que Par deçà, c’est-à-dire, En ces quartiers-cy.
■ Çà Est quelquefois une interjection pour exciter & encourager à faire quelque chose. Cà travaillons. çà allons. çà montons à cheval. çà joüons. çà estudions.
On dit aussi, Cà tout seul, en respondant ou consentant à ce que l’on est exhorté de faire ; comme si quelqu’un disoit à un Marchand, Monstrez-moy des estoffes, il respondroit Cà, pour dire, qu’Il les va monstrer.
On dit encore, Or çà, mais c’est en commençant, & l’on ne prononce guere l’r, par un adoucissement de langage qui est commun à beaucoup de mots.
Vous pouvez cliquer sur n’importe quel mot pour naviguer dans le dictionnaire.