scavoir

2e édition

[I.] SCAVOIR.

verbe actif.
↪ voir aussi : [II.] Sçavoir (n. m.)
■  Connoistre, avoir connoissance de. Je scay bien cette affaire. il ne scavoit rien de ce qui se passoit. je scay qu’il n’est pas de vos amis. je scay que je me suis emporté, &c. il scait le chemin. vous ne scavez pas vostre devoir. qui ne scait pas son mestier, l’apprenne. je scay tout cela, tout ce que vous dites. est-ce que vous n’en scavez rien ? je n’en veux rien scavoir. il scait tout le secret. il scait bien des choses.
On dit proverbialement d’un homme extremement habile, & qui a une grande connoissance des affaires les plus secretes, qu’il scait le fin du fin. Et en parlant d’un homme qui se conduit habilement, & qui va bien à ses fins, qu’Il scait son pain manger. qu’il scait plus que son pain manger.
On dit aussi proverbialement, & figurément d’un homme qui est ordinairement bien instruit des affaires du monde, que C’est un homme qui scait toutes les foires de champagne.
On dit, je ne scache personne, pour dire, je ne connois personne. Je ne scache personne qu’on puisse luy comparer. il n’y a pas esté que je scache, au moins que je scache. je ne scache rien de si beau. je ne scache rien de si bien escrit. Il ne se dit jamais qu’avec la negative.
■ Scavoir, Se dit aussi, De la connoissance p. 564qu’on a de quelque science, de quelque art, de quelque profession, &c. Il scait la Grammaire, la Philosophie, la Theologie, &c. Il sçait les Langues, le Grec, le Latin, l’Arabe. il sçait les affaires. vous dites que cet homme est sçavant, & que sçait-il ? il ne sçait rien. sçavoir son mestier.
On dit prov. d’Un homme tres ignorant, que C’est un homme qui ne sçait ni a ni b.
On dit proverbialement & figurément, qu’Un homme scait la carte, pour dire, qu’Il sçait parfaitement les intrigues, les interests, les manieres du monde, d’un quartier, d’une societé, d’une famille, &c.
On dit, qu’Un homme sçait vivre, pour dire, qu’Il se conduit dans le commerce de la societé civile avec tous les esgards, toutes les mesures, & mesme toutes les precautions qu’un honneste homme est obligé d’avoir, ou de garder avec les autres : & dans le sens contraire, on dit, qu’Il ne sçait pas vivre.
On dit, qu’Un homme sçait bien le monde, qu’il sçait son monde, pour dire, qu’Il sçait bien la maniere de vivre dans la societé des hommes, & particulierement du grand monde.
On dit par maniere de doute & d’interrogation, Que sçavez vous ? que sçay-je ? que sçait-on ce qui arrivera ? que sçait-on s’il le voudra ? la question est de sçavoir.
On dit, que Quelqu’un scait mieux qu’il ne dit, pour dire, qu’Il parle contre sa propre connoissance.
■ Sçavoir, Signifie aussi, Avoir dans la memoire. Il sçait sa leçon. il ne sçavoit pas sa harangue. il a pensé manquer plusieurs fois, il ne sçavoit pas son sermon. il sçavoit sa harangue par cœur.
On dit, d’Un homme qui par ignorance ou par quelque trouble d’esprit ne dit rien, ne fait rien de ce qu’il devroit faire ou dire, qu’Il ne sçait ni ce qu’il fait ni ce qu’il dit.
On dit, Sçavoir gré, sçavoir bon gré, sçavoir mauvais gré à quelqu’un, pour dire, Estre satisfait ou mal satisfait de quelque chose qu’il a dite ou faite, estre content ou mescontent de sa conduite, de son procedé. Je luy en sçay bon gré. je luy en sçay le meilleur gré du monde. il se sçait bon gré d’avoir fait une telle action. il luy sçait mauvais gré. On dit aussi, Sçavoir gré de quelque chose.
■ Sçavoir, Se dit aussi absolument ; & alors il signifie avoir l’esprit orné & rempli de bonnes choses. Cet homme-là sçait. c’est un homme qui sçait.
■ Sçavoir, Signifie aussi, Avoir le pouvoir, avoir la force, avoir l’adresse, avoir l’habileté, le moyen. Je sçauray bien le ranger. je sçauray bien me defendre. il sçait bien tourner les choses comme il luy plaist. vous verrez ce que je sçay faire. Et dans un sens contraire. Il n’a sceu en venir à bout. je le voudrois bien, mais je ne le sçaurois. ne sçauriez-vous aller jusques là. il ne sçait pas respondre quand on luy parle. il ne sçait pas distinguer sa main gauche d’avec sa main droite. il ne sçait pas parler aux hommes. il ne sçait pas ouvrir cette porte ayant la clef dans sa main.
■ Sçavoir, Signifie aussi, Apprendre, estre instruit, estre informé de quelque chose. Vous sçaurez que. afin que vous le sçachiez. je veux bien que vous sçachiez.
On dit, Faire sçavoir, pour dire, Instruire, informer quelqu’un par lettre, par message. Je luy ay fait sçavoir le succez de cette affaire. je luy ay fait sçavoir comme la chose s’estoit passée. faites-moy sçavoir de vos nouvelles. il m’a fait sçavoir qu’il estoit arrivé en bonne santé.
On dit, Faire à sçavoir, pour dire, Faire sçavoir, & il ne s’employe guere que dans les proclamations, les publications, les affiches, &c. On fait à sçavoir que tels & tels heritages sont à vendre. Sçavoir faisons, Formule de Chancellerie & de pratique.
■ C’est a sçavoir. a sçavoir. sçavoir. Façons de parler dont on se sert pour specifier, pour marquer les choses dont il s’agit. On a vendu pour dix mille francs de meubles, c’est à sçavoir deux tapisseries, pour tant. le revenu de cette Terre consiste en plusieurs rentes, à sçavoir en telle & telle rente. à sçavoir en une rente de. l’armée estoit composée de vingt mille hommes, sçavoir dix mille hommes de pied, &c.
On s’en sert aussi, pour marquer qu’on doute de quelque chose. Vous me dites qu’ils contribuëront tous esgalement à cette affaire, c’est à sçavoir s’ils le pourront. à sçavoir s’ils le voudront. sçavoir si vous en serez advoué. vous asseurez que l’ennemi marchera au secours de la place, c’est à sçavoir s’il pourra arriver assez à temps. à sçavoir s’il aura assez tost rassemblé ses troupes. sçavoir s’il osera l’entreprendre. En ce sens on dit aussi, C’est un à sçavoir.
■ Sceu, sceue. part. Il a les sign. de son verbe.
Il est aussi substantif, & il signifie, La connoissance qu’on a de quelque chose, & il n’est guere en usage que dans cette maniere de parler adverbiale, Au veu & au sceu de tout le monde.
Vous pouvez cliquer sur n’importe quel mot pour naviguer dans le dictionnaire.