moy

2e édition

MOY.

■  Pronom personnel & singulier de tout genre, & qui ne sert que pour la premiere personne. Il faut remarquer que ce pronom se met ordinairement à la place du pronom Je dans les cas obliques, & il n’est jamais nominatif d’un verbe qu’avec le pronom Je. Ainsi l’on ne dit point. Moy pretends, moy dis, mais je pretends, je dis. Je pretends moy. je dis moy. moy je pretends. moy je dis. je vous asseure moy qui vous parle. moy dont il dechire la reputation, je ne luy ay jamais rendu que de bons offices. moy à qui il fait tant de mal, je cherche toutes les occasions de le servir. moy ne songeant à rien, j’allay bonnement luy dire. Comme il y a pourtant plusieurs autres occasions où il sert de nominatif, nous en rapporterons icy quelques-unes, & nous marquerons aussi en passant les differents usages qu’il a dans les autres cas, nous reservant à faire de plus particulieres observations là-dessus dans le Traité de la Grammaire. Moy, trahir le meilleur de mes amis ! faire une lascheté, moy ! qui le dit, c’est moy qui vous en réponds. qui fut bien aise, ce fut moy. vous & moy nous sçavons bien. il n’y aura personne que moy. personne que moy ne le sçaura. je m’y rendray moy deuxiesme.
Ce pronom a au genitif, De moy, mais ce genitif n’est presque point en usage : car on ne dit point, La maison de moy, le livre de moy, mais alors au lieu du pronom personnel on se sert du pronom possessif, & on dit, Ma maison, mon livre. Cependant lorsque quelque autre genitif precede, on peut fort bien mettre aussi De moy à la suite de l’autre genitif Ce que je vous dis là est le sentiment de mon frere & de moy. c’est l’avantage de tous les deux aussi bien de luy que de moy.
Il a au datif, Moy à moy, & me ; mais non pas en telle sorte, qu’on puisse se servir également de tous ces trois manieres ; car par exemple, Moy au datif, ne se dit qu’avec la seconde personne de l’imperatif des verbes actifs, & avec quelques verbes neutres, comme Parler ; & il se met tousjours aprés le verbe. Donnez-moy cela, donnez le moy. parlez-moy de cela tantost. Il ne se dit mesme quelquefois que par redondance, & pour donner plus de force à ce qu’on dit, ce qui n’a toutefois d’usage que dans le discours familier. Faites-moy taire ces gens-là. donnez leur moy sur les oreilles.
■ A moy, Se joint avant tous les temps des verbes, excepté la remarque cy-dessus, & hors de cette remarque, c’est le seul datif dont on se sert quand le verbe precede Il est mesme tellement propre aux verbes neutres passifs, aux verbes actifs employez avec les autres pronoms personnels ; au verbe Estre, lors qu’il signifie Appartenir ; au verbe Avoir, lors qu’il est joint aux noms substantifs, Affaire, Rapport, Relation, & quelques autres semblables, au verbe Tenir, lors qu’il est mis à l’impersonnel ; à quelques verbes neutres, comme Songer, Penser ; & enfin aux verbes actifs qui se construisent inseparablement avec un substantif, comme Prendre garde ; Que dans tous ces verbes là il ne peut jamais estre varié par moy ni me. Cela s’adresse à moy. il s’est confié à moy. il s’est donné à moy. il s’attaque à moy. cela est à moy. vous aurez affaire à moy. il ne tient qu’à moy d’aller là. songez à moy. pensez-vous a moy ? prenez garde à moy. parlez à moy.
Il s’employe mesme aprés la seconde personne de l’imperatif des verbes purement actifs, lorsque quelque autre datif precede. Faites ce plaisir là à mon frere & à moy. donnez-luy vostre ressentiment & à moy aussi.
■ A moy, Joint avec un substantif, signifie, Qui est à moy, qui m’appartient. C’est un homme à moy, un habit à moy. c’est de l’argent à moy. du papier à moy.
■ A moy, Se prend aussi dans la signification de vers moy ; & alors ce n’est plus un datif. Marchez à moy, venez à moy. Et on dit simplement, A moy, à moy soldats.
■ De vous a moy. Façon de parler dont on se sert pour tesmoigner à quelqu’un qu’on luy parle selon ses veritables sentiments, mais qu’il faut garder le secret. De vous à moy c’est un pauvre homme. c’est un homme qui ne merite pas l’opinion qu’on a de luy. de vous à moy je ne croy pas que la chose réüssisse.
■ Me, Est la troisiéme variation du datif. Que voulez-vous me donner ? voulez-vous me parler ? il doit m’en escrire un mot. Et il faut remarquer qu’il se met tousjours devant le verbe qui le p. 111regit, si ce n’est lors que ce verbe est à la seconde personne de l’Imperatif ; & que le pronom personnel est suivi de la particule relative En, devant laquelle on retranche l’E. Ainsi on dit, Donnez m’en la moitié. dites-m’en un mot. Et ce n’est jamais que de cette sorte que me, peut estre employé au datif aprés le verbe.
On dit Moy & me, à l’accusatif, mais non pas indifferemment. Moy ne se met qu’aprés le verbe qui regit, & il n’a d’usage que quand ce verbe est à la seconde personne de l’Imperatif. Instruisez-moy. ostez-moy de peine, &c. Ou lors qu’aprés le verbe qui regit, on met quelque autre substantif ; car alors, & à la suite de l’autre subst. on se sert de moy. Il nous est venu voir mon frere & moy.
Hors de là & dans tous les temps des verbes on se sert de l’accusatif Me, qui se met tousjours devant le verbe qui regit, si ce n’est lors que ce verbe est à la seconde personne de l’Imperatif, comme il a desja esté remarqué en parlant du datif Me. Il me sollicite, il m’importune tous les jours. il m’en presse à tout moment. accusez m’en si vous osez. vous m’avez mis dans l’embarras, retirez-m’en si vous pouvez. On dit cependant, Il n’aime que moy, il ne craint que moy.
Il fait à l’ablatif, De moy. Il tient cela de moy. c’est de moy seul qu’il despend. je ne vous parle pas de moy, ce que je vous dis-là, je ne le dis pas de moy seulement.
■ Quant a moy. Façon de parler dont on se sert par energie, & pour donner plus de force & d’emphase à ce qu’on dit. Vous en direz ce qu’il vous plaira, quant à moy je sçay bien ce qui en est. Il n’est guere en usage.
On dit ordinairement, Pour moy je sçay bien, &c.
On dit proverbialement & figurément, Se mettre sur son quant à moy, pour dire, Prendre un air fier. On luy a dit une telle chose, il s’est mis sur son quant à moy. Il est du style familier & ironique.
■ Moy, Se met aprés toutes les propositions. Pour moy, par moy, selon moy, sur moy, & les autres où ce pronom est employé, qui pourront se voir chacune aux prépositions ausquelles il se joint.
Vous pouvez cliquer sur n’importe quel mot pour naviguer dans le dictionnaire.