roy

2e édition

ROY.

subst. masc.
■  Monarque, Prince souverain du premier ordre. Grand Roy. puissant Roy. Roy hereditaire. Roy électif. Roy legitime. les anciens Rois. les Rois d’Assyrie. les Rois d’Israel. les Rois de Juda. les Rois Chrestiens. le Roy de France. le Roy tres-Chrestien. le Roy d’Espagne. le Roy Catholique. les Rois du Nord. la puissance des Rois. la Majesté des Rois. la Cour d’un Roy. en foy & parole de Roy. proclamer un Roy. couronner, sacrer un Roy. élire un Roy. alliance de Couronne à Couronne, de Roy à Roy. Dieu est le maistre des Rois. les Rois ne connoissent que Dieu au-dessus d’eux. Dieu tient le cœur des Rois dans sa main. il est le protecteur des Rois.
Dieu est appellé dans l’Escriture le Roy des Rois, le Roy du Ciel & de la terre.
Roy des Romains, c’est un titre que l’on donne dans l’Empire à celuy qui est designé par les Electeurs pour succeder au titre d’Empereur.
On dit prov. que les Rois ont les mains longues, pour dire, que leur pouvoir s’estend bien loin, & qu’en quelque lieu que l’on soit, il est dangereux de les offenser.
On dit aussi prov. d’Un homme magnifique, qu’Il vit en Roy, qu’il fait une despense de Roy. d’Un homme genereux & liberal, qu’Il a un cœur de Roy. d’Un homme extrêmement heureux dans son estat, qu’Il est heureux comme un Roy, comme un petit Roy. d’Un homme imperieux & hautain, qu’Il parle en Roy, qu’Il fait le Roy. & d’Un homme qui aime à faire plaisir, & qui est d’un agreable commerce, que C’est le Roy des hommes. Ce dernier est populaire.
On dit encore prov. d’Un manger exquis & délicieux, que C’est un manger de Roy, un morceau de Roy, & d’Un grand plaisir, que C’est un plaisir de Roy.
On dit prov. d’Un Roy foible, & qui ne sçait pas user de son pouvoir, ou d’un Roy dont le pouvoir est fort limité, fort borné, que C’est un Roy en peinture, un Roy de cartes, un Roy de theatre.
On dit prov. & dans le style familier, en parlant d’une maison, d’une compagnie où la subordination n’est point gardée, que C’est la Cour du Roy Petaut, chacun y est maistre.
On dit par exaggeration, qu’Un homme est noble comme le Roy, pour dire qu’Il est d’une ancienne noblesse & tres-bien reconnuë : Et lorsqu’Un homme riche & puissant a quelque chose de rare, de curieux, de magnifique, on dit prov. pour marquer qu’il n’y a pas lieu d’en estre surpris : Qui aura de beaux chevaux si ce n’est le Roy ?
On dit, Estre sur le pavé du Roy, pour dire, Estre dans la ruë, ou dans un chemin dont personne n’a droit de chasser celuy qui y est. Et on appelle en plaisanterie, La prison, la maison du Roy.
On dit, Aller où le Roy va à pied, où le Roy n’envoye personne, pour dire, Aller aux besoins naturels. Il est du style familier.
On dit d’Une chose excellente à manger, qu’Elle ne pourroit estre meilleure quand ce seroit pour la bouche du Roy. Il est populaire.
Quand on dit absolument, Le Roy, on entend ordinairement le Roy dont on est né sujet, & c’est dans ce sens qu’on dit en France, Les ordres du Roy. les commandements du Roy. le service du Roy. les droits du Roy. le lever du Roy. le coucher du Roy. obtenir des provisions du Roy. un Benefice à la nomination du Roy. Le Roy seant en son Conseil. une terre qui est dans les plaisirs du Roy. Voyez PLAISIRS.
Servir le Roy, pour dire, Le servir dans ses troupes.
On dit en France, Le Roy ne meurt point, pour dire, Qu’il y a tousjours un Roy, & qu’à la mort du Roy son successeur est dans l’instant, & par le seul droit de sa naissance, saisi de la Couronne & de l’authorité Royale, sans qu’il ayt besoin d’estre investi ni proclamé.
■ De par le Roy. Formule qui signifie, De la part du Roy, & qui se met à la teste de divers actes publics, de diverses affiches.
■ p. 534Vive le Roy. Acclamation publique pour la longue vie & la prosperité du Roy.
On appelle, Maison du Roy, tous les Officiers domestiques de la Maison du Roy, & les troupes de Cavalerie & d’Infanterie qui sont destinées pour la garde de sa Personne & de sa Maison.
Et on appelle, Bouche du Roy, Les Officiers qui apprestent à manger pour le Roy & les offices où ils travaillent.
On appelle, Commissaire du Roy, homme du Roy, Celuy qui a commission du Roy pour quelque affaire qui regarde le service du Roy ou du public : Lieutenant de Roy d’une telle Province, d’une telle Ville, Celuy qui a le commandement en l’absence d’un Gouverneur.
On appelle, Main du Roy, La puissance & l’authorité du Roy interposée dans les procedures judiciaires entre particuliers ; Ainsi, Mettre quelque chose sous la main du Roy, C’est en style de Pratique, saisir quelque chose en Justice.
On appelle les Ordres du Roy, les Ordres de Chevalerie de Saint Michel & du Saint Esprit. Chevalier des Ordres du Roy.
On appelle Coin du Roy, Un morceau de fer trempé & gravé pour marquer la monnoye : Denier du Roy, L’interest qu’il est permis par l’Ordonnance du Roy de tirer d’une somme prestée par contract de constitution : Taux du Roy, Le prix d’une chose reglée par l’authorité du Roy : Poids-du-Roy, & plus ordinairement Poids de Roy, Le lieu où l’on pese les grosses marchandises : Pain du Roy, Le pain qui est fourni aux prisonniers aux despens du Roy. De la monnoye marquée au coin du Roy. prester de l’argent au denier du Roy. cette marchandise vaut tant au taux du Roy. estre au pain du Roy. il manque presque de tout dans cette prison, il n’a que le pain du Roy. il est reduit au pain du Roy. il a fait peser ce balot au poids du Roy.
On appelle, Pied de Roy, Certaine mesure contenant douze poulces en longueur.
On dit fig. Les coffres du Roy, pour dire, Les finances du Roy. Il en reviendra tant aux coffres du Roy.
On appelle, Le jour de l’Epiphanie, Le jour des Rois. Et la resjouissance qui se fait en chaque maison au souper de ce jour là, ou de la veille, s’appelle Faire les Rois. Et parce qu’entre ceux qui soupent alors ensemble, on partage un gasteau où il y a une feve, on appelle ce gasteau, Le gasteau des Rois ; & Roy de la feve, ou simplement. Roy, Celuy à qui eschet la part où est la feve. Toutes les fois que Le Roy de la feve boit, Ceux qui sont à table avec luy crient, Le Roy boit. Et cela se pratique presque dans toutes les maisons. Faire les Rois en famille. faire les Rois en compagnie. couper le gasteau des Rois. qui a esté le Roy chez vous ? ce fut un tel qui fut le Roy. il vous a bien fait crier le Roy boit. la chandelle des Rois.
On appelle, Roy d’Armes, Le Chef des Herauts d’Armes.
On appelle, Roy du bal, Celuy qui donne le bal, ou celui pour qui on le donne & qui mene le premier bransle : Et parmi les Clercs du Palais, Roy de la bazoche, Celuy qui preside à tous les Clercs dans une certaine jurisdiction qu’ils tiennent.
Parmi les tireurs d’arbaleste, on appelle Roy de l’oiseau, Celuy qui abbat l’oiseau. Et parmi les Pelerins, Roy des pelerins, Celuy d’entre eux qui a veu le premier le clocher du lieu où ils vont en pelerinage.
■ Roy, Se dit aussi en parlant de certains animaux qu’on regarde comme les plus nobles de tous. Ainsi on dit, que Le Lion est le Roy des animaux, & l’aigle le Roy des oiseaux. Et les Naturalistes disent aussi que Les abeilles ont un Roy, parce que dans un essaim d’abeilles il y en a tousjours une que les autres accompagnent par tout, comme pour luy servir de garde, & à qui il semble qu’elles obéïssent.
■ Roy, Se dit encore au jeu des cartes de la principale figure de chaque couleur. Roy de cœur. Roy de carreau. Roy de pique. Roy de trefle. tierce de Roy. quarte de Roy. quinte de Roy. quatorze de Rois. fredon brelan de Rois.
Il se dit aux eschecs de la principale piece des eschecs. On ne prend point le Roy, il faut luy donner eschec & mat pour gagner.
Vous pouvez cliquer sur n’importe quel mot pour naviguer dans le dictionnaire.