connoistre

1re édition

CONNOISTRE.

v. act.
■  Avoir dans l’esprit l’idée, l’image d’une chose, d’une personne. Connoistre parfaitement, imparfaitement. connoistre à fonds. je ne le connois que de nom, de veuë. je le connois bien. d’où le connoissez-vous ? je le connois pour l’avoir veu en tel endroit. il me connut à la voix, à la desmarche. je connois sa maniere. son style est aisé à connoistre. je le connoistrois entre mille. je le connois pour ce qu’il est. je connois bien cet homme. il a bien trompé du monde, on ne le connoissoit pas. connois toy toy-mesme. il connoist bien le pays. il connoist la mer. il connoist l’argent. il connoist le bien & le mal. cet enfant ne connoist pas encore ses lettres. il faisoit si noir qu’on ne connoissoit ni bestes ni gens. vous ne connoissez pas vos forces. il connoist son foible. je ne parle point de ce que je ne connois pas. il fit connoistre qui il estoit. il se fit connoistre, se donna à connoistre. ne luy donnez pas à connoistre que.... il connoist bien les bons livres, les pierreries, les bons tableaux. il est grand Philosophe, il connoist bien les plantes, la nature. il connoist le monde, la Cour.
On dit, qu’Il faut connoistre avant que d’aimer.
Connoistre signifie aussi, Avoir pouvoir, authorité de juger de quelques matieres. Ce Juge connoist des matieres civiles & criminelles. il en connoist en premiere instance. il en connoist par appel. il ne peut pas connoistre de cela.
Il signifie aussi, Avoir quelques habitudes avec quelqu’un. Connoissez-vous quelqu’un de mes Juges ? je n’en connois pas un il connoist tout le monde. je vous le feray connoistre. je ne connois point cet homme-là, ni ne le veux connoistre.
On dit, Connoistre une femme, ou la connoistre charnellement, pour dire, Avoir habitation avec elle. Adam connut sa femme.
Connoistre, signifie aussi, Avoüer, admettre. Les Catholiques connoissent le Pape comme le Pere commun. ce Prince est souverain, il ne connoist point de superieur au dessus de luy. il ne connoist point de maistre. c’est un libertin, un brutal, il ne connoist ni Dieu ni diable.
On dit encore, Connoistre quelqu’un, pour dire, Avoir consideration pour luy. Quand il est question d’argent, d’interest, il ne connoist personne. il est devenu trop grand Seigneur, il ne connoist plus ses amis.
Il sign. encore, Admettre, recevoir, En ce pays-là on ne connoist point la loy Salique, on n’y connoist point le droit Romain.
Se connoistre en quelque chose, ou à quelque chose, pour dire, Sçavoir en bien juger. Il se connoist en gens. je me connois en pierreries, en tableaux, en poësie. il ne s’y connoist point du tout. Il n’a gueres d’usage que dans le negatif.
On dit fig. qu’Une personne ne se connoist point à faire, à dire quelque chose, pour dire, qu’Il ne la veut point faire. Il ne se connoist point à faire plaisir. il ne se connoist point à prester de l’argent. je ne me connois point à donner à plus riche que moy.
■ Connu, ue. part. pass. Il a les significations de son verbe.

inconnu, uë

■ Inconnu, ue. adj. Qui n’est point connu. Homme inconnu. gens inconnus. terres inconnuës. Autheur inconnu. l’usage de la Boussolle estoit inconnu aux anciens. Il est quelquefois substantif. Cet avis luy a esté donné par un inconnu.

incognito

■ Incognito. adv. Sans vouloir estre connu pour ce qu’on est, se dit ordinairement des personnes de qualité, qui estant en pays estrangers ne veulent pas estre connus, ou du moins n’ont pas leur train ordinaire, ni les autres marques qui les distinguent. Ce Prince passa incognito par la France. il fut tant de temps incognito à Rome. Il se peut dire aussi de toutes les personnes qui ne veulent pas estre connuës. Ce mot a esté transporté tout entier de l’Italien dans le François.

connoissable

■ Connoissable. adj. v. de tout genre. Qui est aisé à connoistre. Cet homme est fort changé, il n’est pas connoissable. la difference qui est entre ces deux estoffes est fort connoissable.

connoissance

■ Connoissance. s. f. v. Idée, imagination qu’on a de quelque chose, de quelque personne. La connoissance du bien & du mal. la connoissance qu’on a d’un homme. je n’ay aucune connoissance de cette affaire. cela est de ma connoissance, de la connoissance de tout le monde. cela est venu à ma connoissance. je n’en ay aucune connoissance. bienheureux qui a la connoissance de Dieu. il a la connoissance des pierreries, des tableaux. la connoissance des affaires. il a acquis, il possede toutes les belles connoissances.
On appelle, Pays de connoissance, Un pays que l’on connoist, ou auquel on est connu.
Il se dit fig. Des compagnies où l’on trouve des personnes que l’on connoist, des livres & des langues que l’on entend. Quand il entra dans cette compagnie il se trouva en pays de connoissance. vous me parliez Hebreu, à cette heure que vous me parlez François je suis en pays de connoissance.
On dit, Prendre connoissance d’une chose, d’une affaire, pour dire, S’informer, vouloir sçavoir ce que c’est. Il a voulu prendre connoissance de cette affaire. ce n’est pas à vous à prendre connoissance de mes actions.
Connoissance, Pouvoir de juger. La connoissance de ces matieres appartient au Parlement, au grand Conseil. cela n’est pas de la connoissance de ces Juges-là. le Roy leur en a attribué la connoissance.
Connoissance, signifie aussi, Habitude qu’on a avec quelqu’un. Cet homme est-il de vostre connoissance ? à cause de nostre ancienne connoissance. vous avez là une belle connoissance. je n’ay aucune connoissance auprés de ce Juge-là. je luy ay donné toutes mes connoissances. faire des connoissances.
Connoissance, signifie encore, L’usage, la fonction des facultez de l’ame. Il receut un si grand coup sur la teste qu’il luy fit perdre toute connoissance. il a un transport au cerveau qui luy oste toute connoissance. il n’a plus de sentiment ni de connoissance.

connoisseur

■ Connoisseur. s. m. v. Qui se connoist à quelque chose. Si vous dites que ce diamant, que ce quadruple est bon, vous n’estes pas connoisseur. les grands connoisseurs en tableaux. je m’en rapporte aux connoisseurs.

connoissement

■ Connoissement. s. m. Declaration des marchandises qui sont dans un vaisseau, à qui elles appartiennent, & où on les porte, signée du Capitaine & de l’Escrivain.

reconnoistre

■ Reconnoistre. v. a. Se remettre dans l’esprit l’idée, l’image d’une chose, d’une personne p. 233quand on vient à les revoir. Il y avoit long-temps que je ne l’avois veu, j’ay eu de la peine à le reconnoistre. ne me reconnoissez-vous point ? il a reconnu son cheval qu’on luy avoit desrobé. que chacun reconnoisse ses hardes, ses livres.
On dit aussi, qu’On reconnoist une chose, une personne, Quoy qu’on ne l’ait jamais veuë, quand on s’apperçoit à quelque marque ou par quelque raisonnement que c’est telle chose, telle personne.
Reconnoistre, signifie encore, Verifier qu’une chose est ainsi. On a reconnu son innocence. on a reconnu la verité.
Reconnoistre, sign. aussi, Considerer, observer, remarquer. Reconnoistre les dispositions de la Cour. reconnoistre le terrain.
Il se dit principalement à la guerre. Reconnoistre un pays ; une place qu’on veut attaquer. reconnoistre les ennemis. reconnoistre leur contenance, leur nombre, leur mouvement, leur camp, leurs retranchements. on envoya de la cavalerie reconnoistre les passages, les deffilez &c.
On dit, Fraper sans reconnoistre, pour dire, Fraper sans prendre garde qui on frape.
On dit, Faire reconnoistre une redevance, une rente, pour dire, En faire passer un aveu, une reconnoissance.
Reconnoistre, signifie encore, Advoüer. Il a reconnu ses enfants naturels. il a reconnu son fils. il l’a reconnu pour son fils. ces peuples ont reconnu un tel pour leur Roy. il a reconnu sa faute, reconnu la dette. Je reconnois avoir receu. je reconnois qu’un tel m’a presté telle somme. reconnoistre son sein, son escriture. reconnoistre une promesse pardevant Notaire. quand j’eus reconnu que cela estoit ainsi.
Reconnoistre, signifie aussi, Avoir de la gratitude. Reconnoistre les bienfaits, les graces qu’on a receuës.
On dit, Reconnoistre quelqu’un, pour dire, Le recompenser d’un service qu’il nous a rendu, d’une peine qu’il a prise pour nous. Il ne se dit que du superieur à l’inferieur, & dans le style familier. Si vous me rendez ce bon office, je vous reconnoistray. faites-moy cette amitié, je le reconnoistray.
Se reconnoistre, signifie, Connoistre qu’on a peché, qu’on a failli, & s’en repentir. Il avoit fort mal vescu en sa jeunesse, mais il se reconnut sur ses vieux jours. Dieu vous fasse la grace de vous reconnoistre avant que de mourir. il porta quelque temps les armes contre son Prince, mais enfin il rentra dans son devoir & se reconnut.
Il signifie aussi, Reprendre ses sens, penser à ce qu’on doit faire, y faire reflexion. Il estoit tombé en foiblesse, & quand il vint à se reconnoistre .... donnez-moy le loisir de me reconnoistre. il fut surpris, & n’eut pas le temps de se reconnoistre.
On dit, Se reconnoistre & commencer à se reconnoistre en quelque endroit, pour dire, Se remettre dans l’esprit l’idée d’un lieu, d’un pays. Il y a long-temps que je n’avois passé par cet endroit ; mais je commence à me reconnoistre.
■ Reconnu, ue. part. Il a les sign. de son verbe.

reconnoissant, ante

■ Reconnoissant, ante. adj. v. Qui a de la gratitude, du ressentiment pour les bienfaits. Il est bien reconnoissant. il est fort reconnoissant des graces que vous luy avez faites. il a l’ame reconnoissante.

reconnoissance

■ Reconnoissance. s. f. v. Action par laquelle on se remet l’idée, l’image de quelque personne, de quelque chose. Il reconnut d’abord son fils au bout de vingt ans. on s’estonna d’une si prompte reconnoissance. Oreste & Iphigenie se reconnurent, & une lettre fut cause de leur mutuelle reconnoissance.
Dans les Pieces de Theatre le denoüement se fait souvent par une reconnoissance.
Il signifie aussi, Gratitude, ressentiment des bienfaits receus. Grande, eternelle reconnoissance. avoir de la reconnoissance. tesmoigner sa reconnoissance.
Il signifie encore, Recompense qu’on donne pour reconnoistre un bon office, un service. Il vous a bien servi dans cette affaire. cela merite quelque reconnoissance. je vous feray une honneste reconnoissance.
Reconnoissance. Acte par escrit pour reconnoistre qu’on a receu quelque chose, ou par emprunt, ou en depost ; ou qu’on est obligé à quelque devoir. Il me donna ses pierreries en garde, je luy en donnay une reconnoissance. si vous me donnez ces papiers en main, je vous en feray, passeray une reconnoissance. il a passé une reconnoissance à son Seigneur, comme il luy doit tant de cens, tels devoirs. il a esté condamné à me passer titre & nouvelle reconnoissance.
On appelle aussi, Reconnoissance de promesse, d’escriture, Un acte par lequel un homme reconnoist ou est condamné à reconnoistre sa promesse, son escriture.

reconnoissable

■ Reconnoissable. adj. v. de tout genre. Facile à reconnoistre. Il est si changé qu’il n’est pas reconnoissable. cette fausseté est fort reconnoissable. il est fort reconnoissable dans ce portrait.

mesconnoistre

■ Mesconnoistre. v. a. Ne pas connoistre. Il avoit changé d’habit, je le mesconnoissois. ce cheval qui estoit maigre, est devenu si gras qu’on le mesconnoist.
Il signifie aussi, Agir & parler comme si on ne se souvenoit pas de son premier estat. Il est devenu si superbe, qu’il mesconnoist ses parents. il mesconnoist son pere.
■ Se mesconnoistre. Ne vouloir pas se souvenir de ce qu’on a esté. Les gens de neant, les petits esprits se mesconnoissent dans la bonne fortune. souvenez-vous de vostre devoir ; ne vous mesconnoissez pas.
■ Mesconnu, ue. part.

mesconnoissable

■ Mesconnoissable. adj. de tout genre, qu’On ne peut reconnoistre qu’à peine. Depuis sa maladie il est mesconnoissable, elle l’a rendu mesconnoissable. Cet homme a changé d’humeur, il est mesconnoissable.

mesconnoissant, ante

■ Mesconnoissant, ante. adj. v. Ingrat, qui oublie les bienfaits. Il est fort mesconnoissant. je n’en seray pas mesconnoissant.

mesconnoissance

■ Mesconnoissance, Manque de reconnoissance, de gratitude. Il y a un peu de mesconnoissance dans son procedé.
Vous pouvez cliquer sur n’importe quel mot pour naviguer dans le dictionnaire.