tesmoignage

Tesmoignage, se dit aussi generalement de tout rapport de vive voix, ou par escrit touchant un fait. Cette bataille fut sanglante, selon le tesmoignage de tous les historiens de ce temps-là. la ceremonie a esté magnifique au tesmoignage de tout le monde. rendre tesmoignage p. 555à la verité. les Martyrs ont porté tesmoignage de la divinité de Jesus-Christ.

On dit communément qu’Il faut tousjours rendre tesmoignage à la verité, pour dire, qu’Il ne faut point qu’aucune mauvaise consideration empesche jamais de dire vray. Et on appelle, Tesmoignage de la conscience, Le sentiment & la connoissance que chacun a en soy-mesme de la verité ou de la fausseté d’une chose, & de la bonté, ou de la meschanceté d’une action. Je m’en rapporte au tesmoignage de sa conscience. quand on a pour soy le tesmoignage de sa conscience on est bien fort. l’estime de toute la terre ne sert de rien à un homme qui n’a pas le tesmoignage de sa conscience pour luy.

Tesmoignage, s’employe aussi pour Une preuve ou marque de quelque chose. Il ne s’est point enrichi quoy qu’il en ait eu de grandes occasions, c’est un tesmoignage de son desinteressement. sa conduite rend tesmoignage de la pureté de ses actions & de ses intentions. il a donné de grands tesmoignages de sa valeur, de sa probité, de sa fidelité. donner des tesmoignages d’amitié, des tesmoignages d’amour. il luy a donné de grands tesmoignages de son affection.