brusler

2e édition

BRUSLER.

v. a.
■  Consumer par le feu. Brusler une maison. brusler des vaisseaux. brusler du bois, de la paille, du charbon. brusler des pastilles. chez les Grecs & chez les Romains on brusloit quelquefois les morts. brusler un homme tout vif. le brusler à petit feu.
Il signifie aussi, Faire du feu de quelque chose. En ce pays-là on ne brusle que du charbon de terre, que de la tourbe, que du charbon.
On dit, En cette maison-là on ne brusle que de la cire, pour dire, On ne se sert que de bougie : Et On ne brusle que de la chandelle, on ne brusle que de l’huile, pour dire, On ne se sert que de la chandelle, on ne se sert que d’une lampe à l’huile pour esclairer.
On dit prov. & figur. qu’Un homme brusle sa chandelle par les deux bouts, pour dire, qu’Il mange son bien mal-à-propos, en faisant plusieurs differentes despenses en mesme temps.
On dit prov. & fig. J’en viendray à bout, où j’y brusleray mes livres, pour dire, Qu’on fera tout son possible, qu’on emploïera toute sorte de moïens pour venir à bout de quelque chose.
On dit prov. Graissez les bottes d’un vilain, il dira qu’on les luy brusle, pour dire, Que lors mesme qu’on se met en estat de faire plaisir à quelqu’un, il s’imagine quelquefois que l’on veut luy faire tort.
■ Brusler, actif. Se prend aussi quelquefois pour Eschauffer excessivement, causer une violente chaleur, dessecher par une chaleur excessive. Cela me brusle, me brusle les mains. cela brusle le sang. il a une fievre qui le brusle. le soleil a bruslé toute la campagne. le soleil luy a bruslé le teint. la neige, la glace bruslent les souliers.
■ Brusler. v. n. Estre consumé par le feu. Voilà une maison qui brusle. on voyoit de loin des vaisseaux qui brusloient. le bois sec brusle mieux que le bois verd.
Il signifie aussi simplement, Estre chaud, Touchez ses mains, elles bruslent. les mains luy bruslent.
■ p. 192Brusler, Dans le neutre, signifie figur. Estre possedé d’une violente passion, en estre ardemment espris. C’est un homme qui brusle d’ambition. il brusle d’amour. il brusle du desir de se signaler.
Il se dit aussi, Pour exprimer simplement un grand desir, une extreme impatience de faire quelque chose. Je brusle de vous revoir. Je brusle d’aller-là.
On dit fig. & prov. d’Un homme inquiet & impatient de faire quelque chose, d’aller quelque part, que Les pieds luy bruslent.
Prov. & figur. Quand quelqu’un n’a pas mis au jeu, & qu’on veut l’y faire mettre, on dit, que Le tapis brusle : Et quand on veut faire haster quelqu’un qu’on attend à disner, & qui s’amuse trop, on dit, Pendant que vous vous amusez le rost brusle.
■ Brusler, Est aussi n. pass. & signifie comme dans le neutre, Estre bruslé. On ne peut toucher cela sans se brusler.
On dit prov. & figur. qu’Un homme est venu se brusler à la chandelle, Lorsque ne voulant que s’amuser auprés d’une jolie personne, il en devient tout de bon amoureux.
On le dit aussi, d’Un homme qui seduit par quelque apparence, tombe dans quelque inconvenient considerable, & est cause luy-mesme de sa perte. Il s’est venu brusler à la chandelle ; car s’imaginant qu’il n’y avoit point de preuves, il s’est remis en prison, & on luy a fait son procez,
On dit adverb. Tirer à brusle pourpoint, pour dire, Tirer à bout portant, & de si prés, que l’on ne puisse guere manquer son coup. Et fig. C’est une raison à brusle pourpoint. un argument à brusle pourpoint, pour dire, C’est une raison convainquante, un argument convainquant.
■ Bruslé, ée. part. Pain brulé. vin brulé. eau-de-vie bruslée.
■ Bruslé, Est aussi quelquefois subst. Il sent icy le bruslé ; c’est-à-dire, On y sent l’odeur de quelque chose qui brusle, ou qu’on a bruslé. Cette boüillie sent le bruslé, a un goust de bruslé.
Vous pouvez cliquer sur n’importe quel mot pour naviguer dans le dictionnaire.